ATI NINI? AMEKUFA? AMEUAWA?

 





Picha ya Mazishi ya Mwandishi wa habari, Daud Mwangosi aliyeuawa na polisi, Nyololo Mkoa wa Iringa, mwaka jana.



 




Hapa nimeweka Shairi Toka Blogu ya ndimara.blogspot.com, Tulisome tulielewe. Kazi hii nimeichukua kwa Mwalimu, Mshauri, Mwandishi, aliyebobea na Muumini wa "Uhuru hauna mipaka, na kwamba mipaka inawekwa na maadui wa Uhuru."

 

Namuomba radhi kwa kutomuomba kazi kabla sijaiweka hapa kwa manufaa ya walimwengu na hususan watanzania.

 

Shairi: LINI TUTASEMA SASA BASI?

 MCT YAJADILI 

UKATILI TANZANIA

Baraza la Habari Tanzania (MCT) Jumanne, 14 Mei 2013, lilifanya Mkutano Mahususi ukishirikisha Jopo la Magwiji la asasi hiyo, jijini Dar es Salaam. Mkutano ulileta pamoja waandishi wa habari, wanachama wa asasi mbalimbali, vyama vya siasa na watendaji serikalini.

Huu ni mkutano wa kwanza nchini kujadili “Ongezeko la Ukatili wa Vyombo vya Dola na Wahusika Kutowajibishwa.”

Kwenye mkutano huo, mwanahabari na mwenyekiti wa Bodi ya gazeti la RAIA MWEMA, Jenerali Ulimwengu aliwasilisha Mada Kuu juu ya ukatili wa vyombo vya dola huku watendaji wakiondoka bila kuchukuliwa hatua.

Prof. Bonaventura Rutinwa wa Chuo Kikuu cha Dar es Salaam aliwasilisha mada juu ya “Maana na Matumizi ya Sheria ya Kutoripoti Mashauri yaliyo Mahakamani” na Ndimara Tegambwage aliwasilisha juu ya “Usalama wa Waandishi wa Habati Nchini.”

Prof. wa sheria, Issa Shivji alisambaza kwa wote waliohudhuria, “kielekezi” kilichofanyiwa uchunguzi juu ya ukatili uliokithiri nchini na kuonyesha kuwa walioutenda hawakuchukuliwa hatua.

Hapa chini ni shairi lililotungwa na Ndimara Tegambwage ambalo lilisomwa na Prof. Penina Mlama, likiwa sehemu ya ufunguzi wa Mkutano Mahususi.

LINI TUTASEMA SASA BASI!

Siiiiiiiiiiiiiii!`

Wasikie wakisema

Na hata kujinoma

Bila aibu!

Bila woga wa kukamatwa

Bila woga wa kushitakiwa

Bila woga wa kuadhibiwa

Bila woga wa kusutwa!

Ati nini? Eeh?

Wapi? Lini?

Amekufa? Ameuawa?

Oooh!

Si yule bwana mdogo;

Yule pale barazani

Anauza karanga na bisi?

Risasi imemtua mgongoni

Lakini ni bahati mbaya!

Ati ililenga waandamanaji

Lakini yenyewe ikachagua yeye?

Oooh!

Na mmoja ni mmoja

Ni uhai mwanana

Na wengi ni mmojammoja,

Mmoja hapa, mmoja pale

Ni mmojammoja wengi:

Makumi, mamia, maelfu, mamilioni

Nchi yawa uwanja wa maangamizi!

Yametokea Arusha

Wakasema bahati mbaya

Yakajirudia Morogoro

Vifo ni bahati mbaya

Yalitokea Unguja na Pemba

Sasa yashamiri mijini na vijijini:

Sikiliza: twaambiwa bahati mbaya.

Siiiiiiiiiiiiiii!

Ni bahati mbaya kuua juzi  

Ni bahati mbaya kuua jana

Ni bahati mbaya kuua leo

Itakuwa bahati mbaya kuua kesho!

Basi na ije sheria

“Bahati mbaya!” kuhalalisha.

Ni bahati mbaya kuua mmoja

Ni bahati mbaya kuua watano

Ni bahati mbaya kuua watano mara tano;

Bali watasema, bila aibu

Bila woga wa kukamatwa

Bila woga wa kushitakiwa

Bila woga wa kuadhibiwa

Bila woga wa kusutwa!

Penye upenyo wataimba

Ilikuwa bahati mbaya

Penye utata na malengo

Watadai “majambazi”

Wasonaswa na mitego-gumba;

Na intelijensia watachomoza

Kwa uchunguzi usoisha.

Siiiiiiiiiiiiiiii!

Siyo mtu tu afaye

Kuna mali na fedha

Na hata mtima wa umma.

Sikilizeni uporaji

Kihenge kikuu cha umma

Wao waita taasisi;

Ni kuchovya na kuchomoa,

Ni kuchovya na kuchomoa

Wanakula hadi ukoko –

Halafu nini?

Mkuu anapotea

Mkuu anaugua

Mkuu anakufa

Na kufukiwa kama mende –

Hakuna mwakilishi.

Siiiiiiiiiiiiii!

Walokwapua naye wa hai

Wendelea kutumbua.

Waloidhinisha wizi wangalipo

Kuziba mifereji ya taarifa

Na bila woga wa kushitakiwa

Bila woga wa kuadhibiwa

Ya mikataba ni mfano

Hata uwani kusainia

Manono wampa wakuja

Wenyewe wapewa makombo

Jeuri yajaza kifua

Madudu kufunika

Hapa chini “funika”

Hapa kati “funika”

Hapa kati kabisa “funika”

Bungeni, wizarani na ikulu –

Bila woga wa kushitakiwa

Bila woga wa kuadhibiwa

Mazingaombwe tumeona

Funga kazi ya wizi

Kwa watunza mali ya umma.

Wamekana, wametuna

Wamefura kwa hasira:

Hapana! Si kweli! Waongo nyie!

Mchuzi ulipokolea mbiombio Ulaya

Ati “chenji” kuchukua

Bila aibu, bila woga wa kushitakiwa

Bila woga wa kuadhibiwa

Wanaona wanohini

Wanatulia tuli,

Mithili ya maji mtungini.

Wanyama waibwa hai

Nao wang’ata ulimi;

Ardhi ya wenyeji yaporwa  

Kwa mwekezwaji kukabidhiwa.

Haki, uhuru vyaporwa

Mbele ya macho yao:

Bila woga wa kukamatwa

Bila woga wa kushitakiwa

Bila woga wa kuadhibiwa

Siiiiiiiiiiiiiiii!

Useme lipi uache lipi?

Wizi uliokithiri vitengoni

Kwenye miji na vitengo vya majiji

Wenyewe waita mchwa; eti hakuna dawa

Wizi vitengo vya umma

Wenyewe wajitutumua kufidia.

Wanetu wala “unga,” wawa mateja

Wenyewe wajidai kuwa na yao orodha;

Wanasema wawapa muda kujisahihisha.

Hapa tulipo twazama.

Asiyeiba ni mpumbavu

Jizi ni mfano wa mafanikio.

Hakuna kilicho gizani

Ni kweupe pepepe!

Washika usukani wanaona na

Wenzao kushiriki

Ukimya umetanda

Utamaduni wa kutotenda:

Bila woga wa kushitakiwa

Bila woga wa kuadhibiwa

Siiiiiiiiiiiiii!

Lini tuseme sasa basi?
MWISHO

 

 Naomba radhi kuchukua kazi hii na kuiweka hapa toka Mwanahabari aliyebobea Ndimara Tegambwage.
Source: https://www.facebook.com/ndimara.tegambwage




Waandishi wa habari wakiwa kazini kupata habari. habari hizo ni kwa manufaa ya nani? Na kwanini kunatokea mauaji, mateso kwa waandishi na hakuna hatua za maana zinazochukuliwa huku matukio ya namna hiyo yakiongezeka? Soma utangulizi huo hapo chini na Shairi Toka kwa Mwanahabari aliyebobea. Ndimara Tegambwage mwenye maono kuhusu tasnia ya habari. (Picha na Juma Nyumayo)




Picha ya Mazishi ya Mwandishi wa habari, Daud Mwangosi aliyeuawa na polisi, Nyololo Mkoa wa Iringa, mwaka jana.