Na Steven
Augustino, Tunduru
MWENYEKITI
wa Serikali ya Kijiji cha Mchekeni kata ya Marumba Wilayani Tunduru Mkoa
wa Ruvuma, Saidi Ally Makunganya, amehukumiwa kutumikia kifungo cha miezi 6
Jela baada ya kupatikana na hatia katika kosa la uchochezi na kuwaachisha
watoto shule.
Akitoa
hukumu hiyo, hakimu wa Mahakama ya mwanzo Mlingoti, Bw. Kavula James Kayabu, alisema
kuwa katika shauri hilo Mahakama yake imejiridhisha na ushahidi uliotolewa na
upande wa mashitaka ulioongozwa na Diwani wa Kata hiyo, Mhe. Said Msenga na Mtendaji wa Kijiji hicho,
Bw.Omari Mpinga.
Mheshimiwa
Hakimu Kayabu, aliendelea kufafanua kuwa
katika shauri hilo kuwa pamoja na mambo
mengine pia mahakama hiyo ilichukua maamuzi hayo baada ya Mtuhumiwa huyo kuidharau
Mahakama yake na kumtuma Mtoto wake kwenda kuitika kwa niaba yake na kusema
uongo kuwa mlengwa hakuwepo Kijijini hapo na baada ya kumfuatilia wakamkuta
akiwa nyumbani kwake.
Kwamujibu wa
maelezo yaliyotolewa mahakamani hapo, Makunganya alituhumiwa kuwashawishi
na kuwashinikiza wazazi na walezi wa watoto 43 kati ya watoto
45 waliochaguliwa kujiunga na masomo kidato cha kwanza kutoka katikia Shule ya Msingi iliyopo
Kijijini hapo kwa madai kuwa Shule za kata zimekuwa hazioneshi mafanikio mazuri
katika ufaulu kwa watoto wao hivyo hata wakiwapeleka itakuwa ni kazi bure tu.
Kesi hiyo ni
utekelezaji wa kesi 1, 064 zinazo wahusu wazazi na walezi walioshindwa kupeleka
Watoto waliochaguliwa kujiunga na masomo ya Sekondari mwaka 2012 zikiwa ni
juhudi za serikali kuhakikisha kuwa watoto wote waliochaguliwa kujiunga na
masomo wanapelekwa shuleni.
Kwa mujibu
wa taarifa zilizo tolewa na Mkuu wa Wilaya hiyo Bw. Chande Nalicho jumla ya
watoto 2,764 walichaguliwa kujiunga na masomo hayo lakini cha kushangaza hadi
sasa ni wanafunzi 1, 710 pekee ndio walioripoti na kuanza masomo ikiwa ni sawa
na asilimia 63 % ya wanafunzi wote waliochaguliwa kijiunga na masomo mwaka
2013.
No comments:
Post a Comment